03März
2015

It's totally more fun in the Philippines

Hallo mitenand

So ich meld mich wieder mol, duet mer leid bini nüme so zuverlässig mit Blog schriebe wie am Afang... Ich denk das wird eine vo mine letschte Blogiträg vo minre Ziit do im Outreach. Krass man, ich cha das gar nid glaube, aber i drei Wuche isch DTS scho verbiii und es heisst Abschied ne vo allne Lüüt... Aber do wetti jetzt nonid zfest dradenke und jede Moment gnüsse do ide Philippine !

    

Also fangemer doch mol a... Vor vier Wuche hemmer Indie verloh und hend üs ufgmacht richtig Philippine, üsi erst Location isch'd Insle Cebu gsih. Mir hend alli gwüsst es wird sicher unterschiedlich zu Indie und mir hend üs mega gfreut. Nochme lange Flug und anschliessend no zwei Stund Autofahrt simmer den acho imne chline Städli Namens "Toledo". D'unterkunft isch de hammer, es Hostel mitme chline Pool, mit einzel Better und Matraze. Sogar WIFI hets Hostel gha, eifach perfekt... Die erste zwei Täg hets eifach gheisse chli ilebe und Lüüt chli kennelerne uf de Stross/Fründschafte bilde und Kontäkt z'knüpfe zude Church people. Jo es isch üs allne grad ufgfalle, risse Unterschied zu Indie, die Lüüt ide Philippine sind viel offner, die Lüüt sind so herzlich, always smiling, und jo die ganz Kultur isch halt anderst. Philippinos liebets Basketball spiele, egal wie jung oder alt sie sind, es liebts würklich jede und jede weiss genau wie Basketball z'spiele. Das isch mega beeidruckend! Klar uf sonre Insle mit überall Party Musik und s'perfekte summer Wetter chunt me halt schnell id Feriestimmig. Mir hend gwüsst das, dass eher  wird herusforderig sii während dere Ziit do ide Philippine, efiach würklich sich bewusst sie wiso mir eignetlich do sind, nid zum Ferie mache sondern dä Locals vo Jesus verzelle.

Ich weiss gar nid wo afange und vorallem isches schwer mir hend so viel cools erlebt.... hejo ich verzelle eifach mol, cha jo den dihei id Details goo... Also mir hend do au wieder mit Lüüt vonre Church zemegschaffet, die hend eifach üsi Ministry mitorganisiert und sind für Translation do gsih. Klar hemmer au susch mit denne Ziit verbrocht. Mega beeidruckend gsih, die Jugend vo dere Church isch vom Alter vo 16-19nii gsih, und einigi sind scho Pastore. Krass. Nei bi dene hesch würklich eifach gmerkt die sind voll on-fire für Gott! 

Philippine isch jo Katholisch, und würklich eich alli wüssed wer Jesus isch und was er für üs gmacht het. Sie wüssed würklich eignetlichs Evangelium und alles, es isch meh s'Thema womer ihne wend nöchher bringe das Gott würklich zu jedem einzelne ä Beziehig wet ha. Es isch kei Religion, nei es isch me, es isch e Beziehig mitem Creator vo dere Welt! Ich mein in Indie isches einiges härter gsih vo Jesus verzelle, will sie halt a anderi Götter galubed und Philippions wüssed wer Jesus/Gott isch. Mir hend sehr viel evangelism gmacht. I dä erste zwei Täg hemmer grad derfe einige Salvations erlebe. Praise the Lord. Es isch würklich mega eifach gfahle dene Lüüt vo Gott verzelle, will ebe sie kenned ihn und drum simmer we au nüme so "scared" gsih. Usserdem simmer i verschiedeni Schuele gange, i einre Wuche simmer jede Tag inre anderi Schuel gange. Mir hend immer 3er Gruppe bildet, (zwei Studente, 1Translator). Ooo ich säg eu die Kinder idä Schuel (Alter 13-15) hier hend teilwis so guets Englisch hier, und das het mi amed scho chli usegforderet. Aber es isch echt cool gsih, mir hend verschieden Experiences Ihne verzellt vo üsem Lebe, wo mir Gott hend derfe erlebe. Mir hend üs sehr fokusierd dasmer dene Chind viel verzellet über Identität. Das jede Perfekt gmacht ish genau so wie er isch, denn mir sind alli gwollt bi Gott! Mir findet üsi Identität nur bi Jesus! De Grund wiso mir für das Thema entschiede hend isch, wills mega viel Transe do git, aso Männer wo wend Fraue sii. Das isch echt verruckt, trurig!! Aaach die Kids mit ihrne herzige Schueluniforme, ich werd si nie vergesse, überall wennds "high five"...und wenns afanged smile den chasch gar nüme andersht, als zrugg smile!

Sonntags simmer den amed immer i verschiedeni Churches gange, mir hend üs möse ufteile i 3er Gruppe, denn es hend amed ca. vier Churches zur gliche Ziit stattgfunde. Jetzt müender lose, yeah mich hets verwütsht, ich ha "derfe" mini ersti Predigt mache inre Church. Wonis erfahre ha, hani echt zersht nid gwüsst wasi sell verzelle, unds welle ablehne. Doch ich ha denn denkt, nei chum Nate jetzt nimsch die Herusforderig mol aa.... Ich hamich den entschiede zum übers Thema "God speaks through different ways"  mich zvorbereite unds verzelle. Hejo und de Sunntig isch cho, und de Nate het vor ca 70 Lüüt derfe Message preache. *Check* .... Nei es isch e guets Erlebniss gsih, und was d'Rückmeldige abelangt hendses guet gfunde. Aber glich bini froh dasi nid grad wieder dra chume, worshindlich gar nüme i dere Ziit.

Was susch no e cools Erlebniss gish isch, mir hend ein Tag gha wo jede einzel mitme Philippino vode Church People mitgange isch, so dasme mol richtig is Philippiner Alltagslebe inegseht. Ich hamich mega gfreut uf de Tag, und es isch mega gsih. Ha derfe helfe Choche that means Fisch zuebereite und Riss go ichaufe und choche. Natürlich au nocher die ganz Chuchi wieder mache, abwäsche und so...aber do hani jo besti Üebig dank gueter Erziehig vo mine Parents. Aschliessend simmer den as Meer go fische und Kokosnüss vode Bäum hole... und natürlich Nuss grad ufschloo, ustrinke und esse aschlüssend. Ha sogar glernt wies so Chörbli amed flechtet us Palmeblätter für zum de kochti Riss denn z'verpacke. Ischen mega spannende Tag gsih!

So und jetzt no zum Knüller. Mir hend jo immer eimol ide Wuche en DAY-OFF. Min Fründ de Marvin und ich hend denkt "hej do ide Philippine gits so viel schöni Plätz". Mir müend unbedingt so eine gseh. So hemmer de Tag gnutzt zude bekanntischte Wasserfäll zgo uf dere Insle. Für das hemmer extra zwei Töff gmietet (mir ohni Prüefig, wer intressierts scho). Denn ischs los gange, für drei Stunde simmer eifach gmüetlich ade Küste richtig Süde gfahre, mit de Sunnebrülle ufgsetzt und em warme Fahrtwind isches eifach Boss-like gsih. Die Landschafte und die viel Rissfelder sind eifach so wunderschön! Noch drei Stund fahrt het üs den langsam de Po afange a schmerze, doch denn simmer endlich döte gsih. Lüüt ich sege eu, ich ha so was nonie gseh, nur vom Fernseh oder in Feriekatalog. Mittedrin im Jungle hets risse Wasserfäll wo inen chline See springt mit himmelblauem Wasser. Es isch echt wie im Paradies gsih. Unglaublich schön. Klar hemmer unbedingt möse i das Wasser ine und paar Pictures mache. Das wirdi ganz bestimmt nie me vergesse! Awesome. Eifach wunderbar wie üsen Gott die Welt gmacht het. Isch en super aber au ermüedende Tag gsih. Sind den irgendwie am Obig am 9ni zrugg gsih. 

Jo es isch würklich's Paradies do uf de Philippine, ich hets nie denkt dasmirs so gfallt do. Ich ha scho gseit zu mim Kolleg, wenni nid ide Schwiiz uf d'Welt cho wer und chent wähle wo ufwachse den genau uf dere Insle. Es isch efiach so cool zgseh, wie Lüüt so guet mitenand chönd umgoh und die hend nid so "Problem" we mir hend im Weste. Die sind echt eifach happy mit dem was hend und freued sich! Ihr sötted die Gsichter gseh, wensi eu winked und aalachet und uf dich zuelaufed. Ich liebs eifach !

Hejo, leider hemmer den mit schwerem Herzen noch drei wunderschöne Wuche abschied gno vo üsne Fründe. Sitem Sunntig simmer jetzt do in Manila, Hauptstadt vode Philippine. Mir hend jetzt genau no zwei Wuche do, bismer den wieder zrugg gönd noch Australie. Do hemmer d'Möglichkeit inre YWAM Base vo Manila zübernachte. Also ich denk das wers gsih vo mir sowiit! Ich hoff ihr hend chli en Iblick becho wasmir so mached do ide Philippine! Ich denk es wird den nomol ein Blog geh bevor ich heichume.... Es got echt nüme lang, krass! Also macheds guet. God bless

Nate

 

06Februar
2015

India - forever in my heart

Hallo meine Lieben 

So hüt isch wieder üse Day-off, und ich ha schön Ziit zum eu wieder mol z'brichte vode vergange drei Wuche. Mir hend echt mega viel do erlebt in Indie und die Ziit isch eifach so idrücklich und guet gsih. Chas gar nid glaube dasmer morn Obig Indie scho wieder verlönd und nach Philippine reised. Crazy !

Also fanged mir mol aa... also am afang isches jo eher schwierig gsi zum Ministries z'finde, willmer halt no kei  Kontakt gha hend zude Churches do. Doch das het sich verbesseret ide letshte Wuche und mir hend echt sehr viel Sache chöne mache und erlebe durch die Kontäkt womer kenneglernt hend . Mir hend Youthgroups- und Gottesdienst gleitet, hend e Mini DTS-Seminar duregführt, imne Chinderheim simmer go helfe, Evangelisiere, Food verteilt bi Obdachlose, sehr viel Sport gmacht mit Local-People und diversi Schuele bsuecht.... jo es isch echt e astrengendi Ziit gsi, aber genau denn wenn mir Müed gsih sind und viellicht au mol de Aschiss gha hend isch Gott starch in üs gsih.

Als ersts möchtich chli vom Evangelisiere verzelle. Also bevor mir scho nach Indie cho sind, hemmer back in Perth als Team für üsi Region betet, dass eifach Gott derf wirke! Am Afang hemmer würkli nid viel erlebt, und es isch so schwer zu dene Lüt go und sie überzüge, sie wüssed zwor wer Gott und Jesus isch, aber sie glaubet glich a ihri Idol/Götter. Es het üs amed echt mega fustriert und agschisse, do bisch en ganze Obig dusse und verzellsh vo Gott und sie seged nur "Yeah, i know Jesus, but all Gods are the same", es isch echt usefordend gsih zum die richtig Istellig zbhalte für die Lüüt. Doch mir hend eifach witer betet, und Gott bittet er söll sich dene Lüt uf sini Art offebare.

Denn hemmer en Obig gha womer usegange sind go Füess wäschä und evangelisiere, a däm Obig isch efiach Gott so present gsi, mir hend x-Heilige derfe erlebe und sogar ei Person het ihres Lebe Jesus übergeh! Ich ha jo nonie würklich so Heilige erlebt bi andere Mensche, aber das isch so idrücklich, du betisch füren Maa wo sich nüme cha pucke willer so Ruckeschmerze het, und nochem Gebet fangter a lache und schmertze sind weg und er cha richtig id Chnüü und umegumpe! Das isch eifach pures Gänsehaut feeling! God is great.  Ab dem Obig isch wie de Chnopf ufgange und es isch ei Heilig noch de andere cho und immer meh Lüüt hend ihres Lebe derfe Jesus übergeh. Es isch eifach so freudig, wenn du gsesch das Lache i dene Gsichter, wenn si Jesus ii ihres Lebe lönd. Mir hend den au agfange vermehrt mit Open-air's, dass heisst du gosch irgendwo ane und zeigsch paar Fussball-Skills und scho hesch hundert Lüt um di ume, wot de chasch s'Evangelium verchünde und  mit ihne über Gott rede. Am Afang ischmers amed echt schwer gfalle mitem evangelisiere, doch mir isch den eifach bewusst worde, "nate there is no reason to be scared to share the gospel", und so isches au... just go for it! 

 E anders grosse Projeckt womer no gha hend, isch zumne Chinderheim go und dene helfe. Nid wit vo üsere Unterkunft isches Chinderheim, wo unbedingt hilf brucht het bi Garte-und Schrinerarbet. Mir hend Bäum umtue, Wurzelstöck usgrabe und ich als Schriner ha derfe alli WC-Türene flicke und neu fixiere! Es het mega spass gmacht eifach als Gruppe was handwerklichs z'mache und so dene Chinde e freud mache, idem dasmer ihres dihei wieder chli umgfrumt het und sie jetzt ä schöni Spielwise hend ohni Bäum und Wurzelstöck. Super zum Cricket oder Fuessball spiele... Aber es isch natürlich scho hardwork gsih, wemer nur e axt und bikel hät zum bäum und Wurzelstöck umztue. Üsi Händ noch dene zwei Täg echt weh tue und einigi Blottere hemmer au gha. Genau, es Highlight isch natürlich au immer de Pause tee gsih und Biscuits wos üs brocht hend. Hej mir hend alli e neui Sucht gfunde und zwor isch das de Indisch Chai! Es isch iefach soo guet und mir chentet ganzi Chrüeg vo dem trinke .... Und wasi no wot sägä, die Chind sind teilwis mega handicapiert gsih, aber trotzdem hends voll Isatz zeiget und hend sich gegesitig usegforderet wer me Stei cha ufem Chopf trägä und so g'Späss. Das isch mega beidruckend gsih, mir dihei würed doch scho lang usrüefe und hei go... 

E witers Erlebniss isch gsih die viele Church- und Schuelbsuech womer gha hend. Mir sind i verschiedeni Churches gange, immer am Sunntig hemer üs i drei Gruppe ufteilt und jedi Gruppe isch ine anderi Church gange. Nüt isch mit 1.5h Church und nocher hei go esse "swiss like". Nei do simmer amed ufem Bode ghocket, teilwis sogar im Schnidersitz wot noch 3h Church din Po nüme gspürt hesch. Aber au dass sind super Erlebniss gsih, klar mir isches i teilweis zu fromm vorcho i gwüsse Churches, aber so isch jedi unterschiedlich. Aber mir hend e Nepali Church gfunde, mit dene hemer würklich die letshte zwei Wuche voll zeme gschaffet, bi dene merksch efiach, die sind pumpt mit Gottes Freud. Wenn die was machet den mit ganzem Herze, und die Lüüt sind mir mega as Herz gwachse. Ich bi mega gern i die Housechurch gange vo ihne. Noch 3h service bisch den nocher no vom Pastor iglade worde, zum Mittagesse bi ihm dihei! Natürlich au dete hemmer wieder Chai becho! like it. 

Mir sind userdem au i verschiedene Schuelhüüser gsih. Mir hend derfe i Klassezimmer go und vo üsem Heimatland verzelle, und woni "Switzerland" gseit han, sind die einte schier vergange wills so freud gha hend.... Mir hend den au derfe churzes Zügniss geh und vo Jesus verzelle. Es isch no mega krass, die Schuelene sind alli agschribe mit Christliche Schule, aber wenn Schüeler frogsch hends kei anig wer Gott/Jesus isch. Mir hoffed mir hend chöne was hinderloh wo ihne blibe isch und si au chli nochdenklich und frogend macht... Schliesslich sind die alli so schnüssig die Chinde, die derfed nid verlore go! 

 

Ja es isch echt alles mega idrücklich womir do hend derfe erlebe und ich chent no meh viel verzelle, aber ich mues leider scho witers. Ich wird eu den sicher meh verzelle wenich wieder zrugg bin ide Schwiiz. Nurno siebe Wuche, hajaja die Ziit rast undglaublich schnell. Ich hoffe ich ha eu chli chöne zeige was so abgoht bi üs und we Gott do in Kalkutta am wirke isch. Es isch efiach unfassbar was Gott scho tue het i dene Wuche, und mir wüssed er wird au witerhind wirke au wenn mir jetzt den Kalkutta verlönd! Indie isch mir würklich mega as Herz gwachse, all die Lüüt und Chinde.... am Afang hani mi gfroget was machich do nur in Indie, ich will zrugg. Doch jetzt gsehni das mit anderne Auge und wer weiss viellicht got me jo nomol uf Indie.  "I love India" !

Jetzt heisst den Koffer packe und üsi Unterkunft no putze und den am Samstig Mitternacht gömmer an Flughafe richtig Philippine! Ich freumi jetzt scho was üs döte erwartet ! Ich danke eu für euri Gebet für üsi ganzi Gruppe ! Ich wünsche eu alles gueti, bis zum nechste mol !

Liebi Grüessli Nate

12Januar
2015

We made it - Kolkata

Hallo mini Liebe

 
So ich meld mich s’erste mol us Kalkutta (Indien). Han hüt grad es Internet Kaffi gfunde und denkt ich schrib min Blog. Ich hoff ihr sind alli guet is neue Johr grutschet, und hend wieder guet gstartet in eure Bruefsalltag. 
 
    
 
Am 1.01.2015, nochme spektakuläre Neujohr Füürwerk am Fluss, hemmer denkt mir mached grad durä. Denn am 3.30 a.m isches denn endlich los gange, mir hend alli üsi Sache packt und hends in Bus verlade. Mit schweren Herzens hets gheisse Abschied ne, vo üsere legendäre Unterkunft „228“ ! Was mir alles für cooli Sache und Moment döt erlebt hend, unvergesslich!
Mir (ein Team aus 13 Leuten) sind mit de Flug-Airline "Air Asia" gfloge, grad paar Tag vorher hend jo die es Flugzüg wieder verlore, aber mir hend gwüsst üsen Gott wird üs heil noch Indie bringe. Und so isches den au gsih, nach nün Stund Flugziit und emne Lay-over vo zehn Stund simmer um Mitternacht heil in Kalkutta acho. We made it!
 
Mir sind den abgholt worde vo (MEGACITIES), das isch d’Organisation wo üs im Hintergrund begleitet durch üsen Outreach. Mir hend eifach alli nuno welle is Bett und hend üsi Unterkunft chum me chöne erwarte. Acho ide Unterkunft, hets gheisse alles Gepäck uslade, und ufzmol hani so was weiches unter mim Fuess gspührt, ich lupf vorsichtig min Fuess, und ha eifach en halb tote Frosch unter mim Fuess! Ha denkt issy „welcome to India“ 
 
   
 
Während dere Ziit lebed mir do inre christliche Church, im Verglich zu de City  hemmers recht ruhig und sauber. Better sind eifach Holzbretter mitere dünne Matte obedruf, s’Badzimmer het drei so „WC’s“ und ei „Duschi“. WC-Papier derfme nochem „Gschäft“ nid is WC wörfe, es het nebedra extra em Kessel womes cha inewörfe. Haha, dementsprechend schmöckts au ufem WC. Dusche brucht au immer chli überwindig, hesch efiach en (chalt)Wasserhahne mitme Kessel, de Kessel fühlsh uf und leersch dir über de Chopf, eimol shamponiere und wieder abspüele. s’Guete isch bisch nocher würklich hellwach Jo, es isch echt andersht aber guet do in Indie...
 
Die erst Wuche hemmer üs Ziit gno zum die ganzi Bible dure lese, das isch recht heavy gsih, Tag und Nacht simer am lese gsih. Immer wemer glese hend, simmer uf Stross und hend luut vorglese, schliesslich wemer jo s'Wort Gottes proklamiere, dases alli ghöret! Susch hemer Ziit gha zum Kontäkt usfindig mache vo Churches, zum mol den en Gottesdienst oder e Sunntigschuel z'gstalte. Aber mir hend au viel Ziit gha eifach zum Lüüt kenne lerne uf de Stross, i Schuele go und mit de Kids Fuessball spiele und eifach Fründschafte bilde.... es isch so krass, do bisch e risse Atraktion in Indie als White-people. Vo allne Ecke chömeds use zum Hand schüttle und Fotis zmache. Trotz so viel Armut und Primitivä Zueständ hends en risse smile ufem Gsicht und hend eifach Freud a dem wos hend! Do frogt me sich den amed scho, und mir im Lüüt im Weste mached üs über überflüssigi Sache Gedanke, währen die um ihres Überlebe kämpfed. 
 
   
 
Leider hets mi noch de erste drei Täg scho eimol is Bett ghaue.... worschindlich isches wegem Esse gsih, mir sind grad zvierte Chrank worde. Han den 38.4 Fieber gha, und starchs Kopfweh, so simmer de ganz Tag im Bett glege und hend üs verplege lo vo üsem super Leiterteam womer do hend! Am nöchste Tag isches üs den wieder besser gange. Praise the Lord. Es isch echt heikel do, mir müend immer luege wasmer essed und vorallem trinked. s'Problem isch meistens wirsch iglade vo Indische Familie ihres Huus go aluege, und die sind so fründlich und bütet immer was z'trinke und esse aa, und den chasch amed shlecht nei sege aber mir shaffed das sho... ! Susch zmittag - und z'Nachtesse gömmer immer ines Indisches Restaurant, dass isch echt super und ich liebe de scharfi Food do! Meistens gits Chicken Noodles oder Chicken Fried Rice. Like it. 
 
Das Weekend (Samstig) hemmer derfe üsen erste Gottesdienst inre Youth Gruppe gstalte. Jede vo üsem Team het en Part gha. Die Church womer gsih sind isch uu chli gsih, aber es sind mega viel Jungi vo allne alters Gruppe cho, und alli hend e schiss Freud ghaaa. Mir hend mit de Teens Worship gmacht, hend en Sketch vortreit, und en Kolleg und ich hend derfe es Zügniss geh. Ich mue sege, dass hani echt gern gmacht, zersht bini chli nervös gsih, aber Gott het mich super gführt.... Ich ha ihne öpis verzellt über "Hearing God's Voice", we Gott i mim Lebe uf verschiedeni Arte zumir gredet het. Das Biiispiel wo Gott mir klar gseit het ich söll e DTS mache, hani ihne den verzellt. Nochher hemmer no so e Gebetsrundi gha, und die Kids sind so herzig, hocked eifach dir uf Knüü und umarmet dich und froget "sir, can you pray for me". Es isch efiach en mega schöne Obig gsih mit mega viel schöne Idrück. 
 
 
 
Genau jetzt simmer den scho bald zwei Wuche do, vier restlichi Woche blibed üs no zum dene Lüüt vo Gott verzelle, bis mir den witergönd noch Philippine! Es goht üs echt guet do in Kalkutta, aber trotzdem simmer immer froh um Gebet vo eu. 
Ich hoff ich ha eu en chline Iblick chöne geh, was bi eus so abgoht und wes mir goht.... Ich wird mich worshindlich no einisch melde per Bloge, bevor mir ufbrechet noch Philippine!
 
Machets Guet !
Liebe Grüsse
 
Nate
 
 
 
 
 
 
 
 
 
27Dezember
2014

Merry Christmas

Hey mini Liebe

So ich meld mich wiedermol, das wird worschindlich min letschte Blog si vo Perth us! Den am Dunnstigmorge werded mir ufbreche in Outreach nach Indie.... Leck die Ziit isch eifach viel zschnell umegange, chas gar nid glaube. Erst hend doch Lectures agfange und jetzt eifach scho fertig! Uf ei Site machts mi trurig, uf die ander Site isches au cool was neus dörfe erlebe !

Genau, min letschte Blog isch ca. sho wieder drei Woch her. Ich ha eu no döt druf agsproche wege Unterstützig ide Finanze für die einte Lüt i minre Klass. Genau und das Geld het derfe zeme cho genau uf de Mittwuch. Danke eu vielmol für euri Unterstützig, es isch eifach genial gsih zum z'gseh wie jede Tag wieder me Geld zemme cho isch und am Schluss eifach uf de Tag alles gstumme het! Gott isch eifach gross, und er versorgt üs!

Am Dunnstig vor zweiehalb Wuche isch grosse Bsuech uf Perth cho. Min Cousin de Timon isch mich cho go bsueche für die letshte Wuchene do in Perth. Ich hami mega gfreut uf Ihn, speziell grad so überd Wiehnachts Ziit isches cool es Familie Mitglied derfe ide nöchi zha. Zersht hetter natürlich allne Mitstudente derfe Grüezi sege... und alli henden grad mega integriert und is Herz gshlosse, als wär er au en YWAMer ! Das isch efiach soo cool a dere Schuel, es isch eifach ei grossi Familie, doesn't matter vo wo das her chunsch! Das findi so schön und gnüsses mega. Am Afang isches nonid so ganz klar gsih woner chan shlofe, doch mir hend den en perfekte Platz ergatteret woner chan schlofe ! S'organisatorische hends do halt nid so im Griff, aber mir hends den zum guete umgsetzt ! 

Am kommende Weekend simmer den anen Bullriding Contest! Mir hend eine i üsere Klass de isch Profi Bull Rider, und verdient sis Geld so in America. Sin Name isch Josh und de het sich us Spass agmolde zum a dem Contest teilzneh! Klar hemer die Chance gnutzt und sind go luege, mir hend das schliesslich nid grad wieder bi üs ide Schwiiz! Haha, und es isch echt mega cool gsih. Das isch prutal we die uf dene Bulle sich müend hebe....! Er hets den aber nid gschafft und isch usegheit. Aber trozdem isches en super Event gsih, sogar no mit Motocross-Show und Chilbi ! Nei ich ha die Ziit mega gnosse mitem Timon, eifach min Cousin en guete Fründ derfe do zha.... Klar hemer den halt au wieder üs "Ziit" gha, womer üs amed nüme gspürrt hend! Aber das ghört dezue. Mir sind sehr viel an Beach gange, den schliesslich heter au chli wele Bruun werde. Nebst dem simmer no noch Kangaroo-Island, womer noch langem umelaufe endlich mol paar Kangaroos gseh hend ....Fussballmatch vo Perth Glory simmer go luege, Fitness het natürlich au nid derfe fähle, genau es isch efiach e cooli Ziit gsih Timon au mit dir derfe Wiehnachte zfiire in Australie! Speziel aber cool :) ! Ich denk ich lade eifach paar Bilder ufe wo das söled zeige... !

              

Leider sind die zweihalb Wuche viel zschnell umegange und de Taimen isch hüt wieder heigange, poor wienich Abschied hasse!  aber sguete isch mir werded üs bald wieder gseh! Und uf das freumi jetzt scho! Jetzt heissts füre luege und sich uf de Outreach freue, genau bald gots loos! Am 1.Januar am Morge am 4Uhr werded mir ufbreche! Ich bi echt gspanne wie das wird.... Es macht au trurig, will jetzt wird die ganz Klass ufteilt i drei Gruppe! I dä nöchste paar Täg isch no putze vode Base und üsre legendäri Unterkunft "228" agseit ! Ach alles nimmt ein Ende, ehrlichgseit hani zurziit grad chlige müe, ich will gar nid go, die Lüüt sind so cool do und jetzt fanget alli a packe für de Outreach ! Aber ich weiss au das de Outreach e mega bericherig wird für üs alli, und üs d'Auge neu wird öffne was alles für armi Länder/Städt git uf dere Welt. Die erste siebe Wuche werded mir in Kalkutta sii und den 4 Wuche ide Philippine! Das wird bestimmt ganz coooli Ziit und Erfahrig! 

Ich wirde nuno eimol wöchentlich Internet ha im Outreach hends üs gseit, und zwor immer wemer üsen Day-off hend! Wenn de isch werded mer no informiert... aber es wird sicher hart, zum im kontakt blibe mit eu, doch ich gibs beste zum mich melde!! 

Also ich hoffe ihr hend e schöni Wiehnachts - Ziit derfe ha mit eune Liebste und Familie. Ich has echt au mol spannend gfunde do in Australie Wiehnachte zfiire, aber es isch sho en mega unterschied! Vorallem fühlts sichs überhauot nid wie Wiehnachte aa, mit 38 Grad am Strand hocke und Sunne chocht eim richtig dure :) aber es isch e cools Erlebniss gsi!

Also mini Liebe ich wünsche e ganz e gueti Ziit ! Gnüsset Festziit und en guete Rutsch is Johr 2015! Ich halt eu ufem laufende was alles so abgoht im Outreach! Mir ghöred üs....

See ya...

Nate 

 

 

07Dezember
2014

Lectures almost done !

Hallo mini liebe...

Und wieder sind drei Wuche vergange sitem letshte Blogitrag. Letsht Weekend hani fast kei Ziit gha zum de Blog schriebe. Defür schriebi jetzt chlige me über die letshte drei Wuche .... hoffentlich chani mi no aa alles erinnere !

Also fangemer mol aa, vor drei Wuche hemmer am Weekend dörfe go Würstli verkaufe, will de grössti Teil vo üs brucht no Geld für de Outreach. Und a dem Weekend isches riesse Fest gsih ide City und das isch die perfekti Glegeheit gsih zum richtig Kohle zmache. Min Job isches gsih Grillmeister zspiele.... wasi den chli bereut wills so heiss gsi isch de ganzi Tag. Nei es isch super funny gsih und mir hend einiges a Geld zemebrocht. Am Obig simmer den no alli zeme es Fuessball spiel go luege vo Perth, was voll abgange isch. Am Sunntig hemmer den de bekannti Weekendservice gha, do hemmer eifach de ganz Tag Food vorbereitet für Mahlziite und putzt. Das Weekend hani echt chli müeh gha mit Fründinn, Fründe und Familie zvermisse, wills halt eher langwilig gsih isch. Aber au das isch verbii gange! 

   

Es isch Mentigmorge worde und Gott hetmir e mega cools Bild zeiget ide stille Ziit. Ich bi echt down gsih, ha null Motivation gha weg de letshte Wuche. Ich ha ihn eifach bittet zum neui Motivation und Kraft zgeh für die kommendi Wuche, denn hani mini Auge ufgmacht und gseh zwei Löwezahn vormir. Eine isch völlig verwelkt gsih und de ander het Blüete gha. Ich denk Gott hetmir welle zeige, "hej die letsht Wuche isch halt nid so guet gsih (verwelkti Blueme), doch für die Wuche gibich dir wieder Power und Motivation (blüendi Blueme)! So e cools Bild gsi.... en richtige Powerstart id Wuche  gsi! Die Wuche ischs Thema "Missions" gsih und mir hend en Sprecher vode Surfer DTS gha. Was mir eingefahren ist, dass es auf der ganzen Welt noch über 6900 unerreichte Menschengruppen gibt. Ich ha au gmerkt das ich nur evangelisert ha uf Knopfdruck, und jo i wets probiere überall woni anegoh, mini Auge offe zha für Lüt wo Gott nonid kenned ! Noch dere Wuche simmer den voll motiviert am Fritignomittag go evangelisere, und mir hend echt cooli Sache erlebt ! 

So jetzt machi chli en Sprung idi vergange Wuche 9. Die Wuche isch Hauptufgob gsih s'Gebäude "Summerville" zfertig stelle.  Es het möse bis am Mittwuch "Füürtechnisch" fertig gstellt sii, will den isch Inspektion cho go s'Projekt abzneh. Min Job isches gsih Türene zmontiere. Das sind kei Holzrähme gsih, sonder so blödi Stahlzarge. Am afang hani chli müeh gha, aber noch zwei, drei Rähme bini de Chef gsih ! Mir hend die halb Wuche dete gschafft und mir hends gschafft s'Gebäude zfertigstelle! S'coole isch, es isch abgno worde und jez chönd no d'Chlinikeite abgschlosse werde. Am Mittwoch hemmer den no es feins Helferesse gha, dass isch echt de börner gsih, simmer iglade worde zu Barbecue vomne Leader a därä Base. *lecker* 

      

Die Wuche isch Thema "Lordship" gsih, und das isch eis vo mine Favorite gsih bis jetzt! Es isch drum gange Gott würklich Überhand ge i jedem Bereich i üsem Lebe. Ihm söll alles ghöre und er söll alli Recht über mis Lebe ha. Und oft seged mir doch eifach us gwohnheit im Gebet "..... oo Lord ..." und sind üs gar nid bewusst was eigentlich heisst. Lord heist, er isch würklich de Herr über allem, er isch de wo Himmel und Erde gshaffet het, er isch de wo üs/mich gschaffe het! Ihm söll alles ghöre vo üsem Lebe. Be faithful and don't be fearful! Simer doch eifach treu und vertrauet Gott! Er het sowiso de besti Plan für üs vorbereitet! Ich weiss es isch nid immer eifach, vorallem weme so ad Zuekunft denkt. Aber er isch Lord, und er gseht witer !      

Genau, die Wuche hemmer anstatt Morgesport, Morgegebet gha. Den einige wartet/vertrauet eifach no uf Ihres Geld für de Outreach. Ingesamt brucht mis Team no 12'000.- ! Ich ha nid gwüsst, dasme do hi cha cho, ohni dasmes Geld uf de Site het. Sind halt nid alli so vorbereitet wie d'Schwiizer  Aber jo mir vertrauet jetzt eifach das, dass Geld no derf zemecho! Ich ha irgendwie de Idruck becho dasich öper söll unterstütze, aber isch no schwer wiviel und wem. Ich weiss ich ha mis Geld zeme, und i will au gar nid bätlä, aber ich ha denkt i frog jetzt eifach mol eu. Wenn ihr das jetzt dureglese hend und irgendwie de Idruck hend, "hey do chenti öper unterstütze, und ihm e Möglichkeit ge zum ines arms Land goh und dene Lüt vo Gott verzelle" ! Wenn eu das aspricht derfeder mir gern schriebe, und ich wirds dene Lüt sege und ihne s'Geld geh, wo ihr mir den wieder mir chented zahle. Ich hoff has chli guet derfe überebringe, will echt nid bätlä. Aber mir hend au Lüüt wo gar kei Familie hend und nid würkli e guets Umfeld wos Geld chend zemmebringe. Es isch ganz freiwillig. Üsi deadline isch de kommendi Mittwuch womers Geld müend ha für de Outreach!

Das isch übrigens mini Outreachgruppe, wommer zersht für sechs Wuche nach Kulkatta und anschliessend für fünf Wuche nach Philippine gönd. Mir sind echt alli mega gspanne uf die Ziit, es got nurno drei Wuche bismer losgönd!   

      

 

 

Das Weekend simmer mit de ganze Sports DTS go Campe. S'erste mol so richtige weg go vode Base, mir hends echt chum chöne erwarte. Ich bi jo eich nid so Camping fan, doch es isch eifach de hammer gsih! Am Fritignomittag noch de Application simmer den losgfahre, drei Stunde Busfahrt hemmer gha bismer den am 7.00 pm amne gmüetlich Plätzli imne Wlad achoo sind. Als ersts hemmer üsi Zelt ufgschlage, mit Taschelampe und Kopflampe hemer das gmacht, den es isch scho mega dunkel worde! Mir sind recht müed gsih und sind scho blad go schlofe. Hej aber das isch Horror gsih, mir hend kei Matte debi gha und es isch so Hart gsih, du hesch jedes Steili und Stäckli gspürt! Am Samstigmorge hets en richtige Camperzmorge geh, mit speck brot und eier! Lecker! Am Tag dure simmer go Kanu fahre und go schwümme, wil mir hend en super Fluss ide nöchi gha. Leider hets duur die harti Sunne au chli Sunnebrand geh, aber isch scho fast wieder weg :) ! Am Sunntig hemmer den nüme viel gmacht, fein Zmorge gesse und den alles zemepackt und wieder zrugg gfahre! Jetzt bini richtig froh derfi wieder e Matraze ha zum schlofe !

  

     

Yeah, die Wuche chunt de Timon min Cousin uf Bsuech! Uf das freumi mega, denn chömer chli Sache zeme unterneh und die warm Sunne gnüsse! S'Thema i dere Wuche isch "Relationship", bini natürlich mega gspanne was mir do werded ghöre. Wiehnachts feeling chunt au immer me uf do. Es isch aber scho speziel wenn so 35 Grad hesch, d'Sunne brennt abe und du gsesch efiach so Wiehnachtsbelüchtig ide Stadt und so... Aber es isch sicher mol was anders. Bin uf allfäll gpsanne... Ich denk ich wird mich no eimol melde bevor dasmir den in Outreach gönd! Ich wünsch eu ganz e schöni Adventsziit! Gnüssed de Schnee chlige für mich, wenner hend! Demfall bis zum nöchste mol mini Liebe.....

Liebi Grüess us Perth

Nate

15November
2014

Die Hälfte von der Hälfte

Hallo zämä

Und scho wieder sind zwei super Wuche verbii, erst grad hani doch de letschti Blog uegstellt. Es got eifach unglaublich schnell die Zitt do ! Jetz hemmer scho sechs Wuche hinder üs, i witere sechs Wuche heisst scho Sache packe für in Outreach ! Woooow...

Also fangemer doch mol aa, also die letschte zwei Wuche bini chli agschlage gsi will am vorletschte Fritig hani mini Schultere bim Fuessball überdehnt. Ha den müesse für e Wuche e Schlinge trägä dassi min Arm chli cha entlaste. Leider hetmi das ghinderet zum ade Morning excercise und a andere coole Aktivitäte teilzneh, dass het mi echt chli agschisse... ! naja aber jetzt gots besser und die Wuche hani scho wieder smeiste chöne mitmache ! 

Ha jo letschtmol verzellt vo dem Projekt woni wot mithelfe ufbaue. Das simmer jetzt voll dra, zweimol ide Wuche für vier Stund gömmer go helfe! Leider got nid meh, damir susch no Programm hend. Aber es macht echt Spass. Bim erste mol isch chli müehsam gsih, will mir zersht hend möse igschaffet werde, und nid würkli gwüsst hend was mache! Isch scho intressant wie die do baued, die mached kei Muure us Bachstei, si stehled eifach so Stahlkonstruktione uf, wos zersht isolieret und noch mit Füürfeste Platte beplanket. Min Uftrag isches gsih mitem Kolleg Stahlkonstruktione zueschnide und ufstelle.... Ziel vo dem Projekt isch bis Endi November sött alles fertig sii ! Ich glaub do hends sie sich bizli unterschätzt :) Es git no so viel zmache, aber wir werden sehen... Es isch echt cool en Teil zsii vo somne Projekt, und mit andere Lüüt sowas ufzbaue !

        

Letsch Wuche isch s'Thema Spiritual Warfare gsih mit me Speaker vo Brasilie! Das isch e spannends aber au usefordernds Thema gsih. Es beinhalte chli das was ide unsichtbare Welt abgoht, wenn mir versuecht oder agriffe werded vo Satan. Doch mir hend Authorität vo Gott, und i sim Name isch so viel Chraft! Nirmerd chan üs die Authorität wegneh ! Mir hend jede Fritig Strosseisatz, und a dem Fritig simmer zum Staatsgebäude gange. Den hemmer üs ii fünf Gruppe ufteile und hend bettet bevor dasmer uf Stross sind. Womer wieder zeme cho sind hemmer ustuscht und Jetzt chunts coolste.... vier Lüt us jeder Gruppe hend de glich Idruck becho vo Gott. "Mir sölled als ganzi DTS um das Gebäude laufe und zwor siebemol und bättä für die Lüt wo i dem Gebäude schaffed! So à la Jericho... hej das isch soo e supper Ziit gsih, mir hend Lieder gsunge bättät und tanzet ! Eifach hammer gsih. D'lüüt hend den ufzmol afange luege wasmir doo mached. Am Schluss hemer es Chrüz bildet vorem Gebäude ! Das isch en super Nomittag gsih !

Und den isch wohlverdiente Weekend cho, es isch so richtig heiss worde. Mir hend beschlosse dasmer an Beach gönd. Das sind zwei super Täg gsih am Beach, und ich mue aso scho sege dasi no kein Sunnebrand becho cha, trotz verwendung vom Sunneoil. Am Samstig sind de Marvin und ich no chli länger am Beach blibe willmer denkt hend mir wend de Sunneuntergang am Beach erlebe. Mir hend zwor es Zitli mösse warte, doch wos den sowiit gsih isch, isches eifach so herrlich gsih. Die Farbe wo sich gspieglet hend im Wasser, und eifach gseh wie Sunne so langsam hinderem Meer verschwindet ! Das isch so en schöne Moment gsih. Hani aso scho grad chli min Schatz vermisst. Denn simmer zrugg gange id Base und hend no e rundi Monopoly gspielt. Hej ich segs eu das Spiel spieled mir so oft, und es macht so Spass. Ich weiss au nid aber hamer scho chli en Name gmacht "Swiss Bank" oder "Cheater" nennets mi. Sind worschindlich eifach nidisch dassi gwunne han. Nei das macht so Spass mit Lüüt us de ganze Welt Brettspieli spiele!

 

Am Sunntig Morge hets es spezial Frühstück geh fürd Schwiizer. Und zwor het en Schwiizer wo scho 12 Johr do une isch, all Schwiizer Studente zu sich iglade füren Schwiizer Brunch. Wooow das isch eiifach so super gsih, es het Zopf geh, Spiegeiler, Speck und Fruchtsalat. So richtigs typisch Morgeesse ide Schwiiiz, doch de Zopf isch nid so guet gsih we de vo mim Mami!! Hami grad mega dihei gfühlt, und natürlich hemmers allli gnosse wieder mol chöne Schwiizerdütsch szrede. Das schätzi mega a därä Base, mir sind eifach ei grossi Familie, au wemer us verschiedene Länder chömed mit verschiedene Kulture.

       

Voll motiviert simmer den idi nöchst Wuche gange. s'Thema isch "Father Heart of God" gsih. Mir hend en Sprecher vode Fitchi Insle gha. De isch uu schwer gsi zum Verstoh, willer sonen lustige Akzent gha het. Aber er het u viel mit sinre Mimik gschaffet. Es isch drum gange dasmir alli en Vater bruchet, en Vater isch es Vorbild für üs, en Vater stot a üsere Site und got mit üs durch alli Problem. Ich weiss das es nid immer eifach isch en guete Vater chöne zsii, und mir mached alli Fehler. Aber üsen himmlische Vater isch de besti Vater womer chönd ha. Er isch non-stop online und isch immer mit üs! Es isch es Thema gsii womir eich scho kennt hend, aber glich isches guet gsih das nomol ufzarbeite. Will es het glich paar Sache geh womer neu glernt het. Er het üs en Churzfilm zeigt vonre Vater-Sohn Beziehig, womich mega berührt het, und ich eu gern wot zeige. De Vater git alles für sin Sohn, er lot ihm a sim Lebe teil ha, unterstüzt ihn woner cha und nimten überall mit. D'liebi vo üsem Vater im Himmel isch aber no so viel grösser, sii isch unendlich wiit! Wener churz Zitt hend denked doch churz drüber noo....  https://www.youtube.com/watch?v=ax4VIVs-qsE

Öpis mueni eu no mitteile, die Wuche hani so e cools Erlebniss gha. Mir sind eimol me nochem Esse in McDonald gange, wilmer immer no hunger gha hend. Ufem Weg zum McDonald simmer amne Restaurant verbii gloffe wome het chöne dusse hocke. Zuefälligerwis hani döt aneglueget und denkt hmm die Person chunt mir bekannt vor und bin zu Ihre anegange "hej bennj das isch bisch doch du?" Und tatsächlich hockt doch eifach de Bennj Jan döte mit sine Fründe vo Südafrika! Leck hend mir mösse lache! Ich ha das chum chöne glaube, die Welt isch so gross, und mir treffed üs eifach in Perth imne unbekannte Restaurant. Ha de Smile de ganz Obig nüme wegbrocht. Gott isch eifach super! Das isch so e supper cools Erlebniss gsiii !

      

So und das Weekend heissts Geld verdiene für die Lüt wo ihri chöste nid chöne zahle fürs Outreach! Ide Stadt isches risse Fest womir werded en Stand ha und Barbecue verkaufe! Hoffentlich chani grillmeister sii. Das wird sicher super, bin vool gspanne druf. Und am Sunntig hemer Weekend Service, das heisst mir werded di ganz Base möse putze und go ichaufe go für die kommend Wuche. De Dienst trifft jedi Smallgruppe eimool, ich hoff eifach dases nid allzu schön Wetter isch, damit ich kei Sunnestrahle verpasse! just kidding, ha jo no gnueg Ziit für das....

Hejoo ich denk das isches wieder gsih vomir. Hoffe ich ha eu chli chöne en Iblick geh was bi üs so abgange isch die letschte zwei Wuche! Mir hends würklich super do.... ich fühl mich mega wohl. Aber glich bini froh und dankbar um euri gebet! Ich bi eifach dankbar derfi so e super Family ha und Fründe wo mir mol schribed, wo a mich denked und für mi bettet !

Ich vermiss eu alli ! Wünsch eu e gueti Ziit...

Grüessli usem warme Perth 

Nate

01November
2014

A month into knowing and enjoying God more

Hey zeme

So ich meld mich wiedermol bi eu, jetzt sind jo scho wieder zwei Wuche vergange sitem letschte Blogitrag. Die Ziit do vergoht so schnell, das chani gar nid glaube. Jetzt bini scho en Monet do, Langsam aber sicher hemmer üs iglebt und an Tagesablauf gwöhnt.

Die erste paar Wuche isch de Morgesport nid so das wasi mir drunder vorgstellt han, eher chli zu gemütlich. Doch den hemmer mit üsne Staffs greded, und jetzt ziehts endlich mol chli aa mit richtiger Morning excercise. Die Wuche simmer dreimol go jogge, mit aschlüssendem Hill climbing ! Das isch richtig männlich gsi ! Schliesslich wemer nid nur geistlich wachse, sondern au körperlich 

Die vorletzt Wuche isch Thema Repentance & Forgiveness gsi ! Das isch so e gueti aber au useforderndi Wuche gsei. Mir hend e super Speakering gha, die het das soguet chöne überebringe ! Klar hani scho viel Sache gwüsst, aber mir isch eifach nomol bewusst worde, das "Sünd" e Wahl isch, jede het möglichkeit sich defür oder dagegen z'entscheide. Meistens isches nid eifach sich fürs richtige z'entscheide, doch uf duur bringt das bestimmt besseri Frucht ! Und Repentence (bekennen) isch nid eifach sägä "sorry Gott für das ...." , sonder ich trei de Sünde de Rugge zue, und wend mich zu Gott ! Und den isch der Tag der Tage gekommen, am Fritig hemmer als Klass als dörfä Gott anelege, und ihn um Vergebig bitte. Phuuu ... das isch scho mega heruseforderig gsih für jede, will jo jede bringt sis "dunkle" as Liecht ! und den no uf englisch.... aber es isch so guet gsih, mir hend eifach derfe alli frei werde vo dänä Sache was üs no i Chette ghalte het, zum üs voll derfe uf Gott fokusiere ! Wämä sini "Sünde" abgleit het, hetme sin Zettel dörfe as Chrüz anenagle als Symbol,dass die Sünde jetzt bi ihm sind und er üs frei gmacht het ! Es het au üs als Klass no nöcher zemme brocht, will jede vo sich Priis git. Das ganze isch über 10 Stund gange, so en schöne befreiende Tag gsi für üs alli !! Gott liebt üs so fest, und er vergiit üs all üseri Sünde !

      

Ide selbe Wuche hemmer au no üsi Outreachziel erfahre, also es werded drei Gruppene gmacht. Jedi Gruppe got sicher uf Kalkota (Indie) und nocher no ines anders Land. Die andere drei Länder sind "Philippine, Thailand und es anders Land in Asie" gsi. Üsi Ufgob isches gsi efiach für die zweit Destination zbette wo üs Gott ha will. Für das hemmer nur zwei Täg ziit gha. Ich ha zersht denkt das got doch gar nid, aber Gott het mir e klari Antwort ge. Underenand hemmer nid derfe ustusche, will me söll sich würklich uf das fokusiere was Gott will, und nid wo de best Kolleg au anegot. Ich ha au Gott drum bettet dasi doch derf mitem Marvin inre Gruppe si, will er isch echt en super Kolleg ! Ein Tag spöter hani ide stille Ziit e klari Antwort becho, dasmin zweite Ort Philippine isch. Yeah ! Den hetme das müesse ufen Zettel schriebe und em Leiter abgeh, und nirmert het vom andere gwüsst. Am Mitwuch Obig isches den usscho mit wem me in Outreach got, hejj soo coooli Gruppe hani, sogar de Marvin isch i minre Gruppe, eifach super ! Gott isch eifach sooo guet !! Am liebste würemer jetz scho go, doch mir hend no paar Wuche "Theorie"

Die Wuche hemmers Thema Intercession & Worship gha ! Au e mega spannends und intressants Thema. Intercession isch Fürbitte, was so viel bedütet dasme für e bestimmts Thema bette inre Gruppe. Me cha das mitme Snipperschütze vergliche, man visiert ein Ziel an und BOOM ! Gmeint isch  dasme sich uf eis ThemDa fokusiert udn voll für das bettet. Am Anfang isch das recht neu gsih für mich, doch jetzt machts voll Spass und me erlebt mega viel ! So gnueg gschriebe, jetzt verzehli nochli vode Freizeit und Fun Aktivitäte. 

Letzt Samstig, simmer ca 50 Minute vo üs entfernt go Klippe springe, zerst hani nid welle mit go, doch di andere hend mi den überredet zum au mitcho ! Also hemmer üsi GoPros mitgno und sind zu de Klippe gange ! Leck han ich überwindig brucht zum springe, will jo es isch 11 Meter hoch gsih ! Aber umso cooler isch den n ocher gsi, danis gmacht han ! Zum Glück hemmer erst nocher erfahre, das döt womer inegange sind, scho öfters Hai gsichtet worde sind. Naja wir waren schneller 

   

Hmm was chani eu no verzelle... aaa jo genau, die Wuche hends Lüüt gsuecht wo wennd helfe es Gebäude nebed de Base baue, das no me Studente chönd ufneh. Ich ha denkt " ou yeah, das wer cooli Sach, geb no chli e Abwechslig drii, wie nur im Schuelzimmer zhocke. Doch denn hemmer es Treffe gha wos üs gnäueri Infos ge hend, und jo als Student bruchsch e White Card wo 55$ kostet, dezue muesch no Sicherheitsschueh kaufe vo 40$  und üs wird Freiziit drufgo womer hend am Mittwuch und Mentignomittag. Den hani eich welle absege, doch min Smallgroupe-Leader het den gseit ich söll Gott froge was er will. Ich heg no gnueg Freiziit und ich cheng was baue für Gottes Rich. Ganz tüüf im Herz hetis scho gern gmacht, was handwerklichs ! Hey und jetzt mach ichs, und i freumi vool, derfe mit no anderne coole Lüt was ufzbaue für Gottes Rich ! So excidet ! wueee.... Gester hemmer no mösse en Online Test ablege für die White Card ! Natürlich bestande !

Hüt simmer go helfe Auto Wäschä, sind gesterd vonre Frau ide Base agfrogt worde zum ihre helfe Autowäsche, si brucht Geld für de Outreach ! Mir hend schlecht chöne nei sege, im erste Moment hets üs chli agschisse, denn mir hettet gern mol usgschlofe am Samstig. Aber es isch denn voll spassig gsih, sind no recht viel Autos verbii cho. Hend amd voll de stress gha, aber es isch soo lustig gsih ! So cooles Erlebniss gsih, bimer vorcho we imne Amerikanische Film 

 

Es got mir echt super do, jede Tag isch anderst aber glich super ! Mir hend Gott scho so oft derfe erlebe i verschieden Situatione ! ich bi gspanne was als no uf üs zue chunt de nächste zwei Monet... por krass, nuno zwei Monet.... und den gömmer scho in Outreach ! Nei ich gnüsses echt do, mitem Englisch chunts au immer chli besser ! 

Also ich denk das isches gsih vo mir... ii freumi über jedes sms, email oder es Briefli vo eu... ahjo das wer no mini Post Adresse :

Nathanael Erb, PO Box 8501 Perth Business Centre, 
Western Australia, 6849, Australia.

Vermiss eu alli ganz fest ! 

Liebei Grüess usem warme Perth

Nate

 

 

 

16Oktober
2014

The Journey has started ....

Hallo zämä.....

So ich meld mich wiedermol. Es duet mir leid, mis Ziel isch eich gsi dasi mi jedi Wuche will bi eu melde. Aber de Tagesablauf isch gfühlt mit Sport und Unterricht. Aber jetz hani mol ziit gfunde zum eu chli mitteile wies mir got. Ich hoff es isch guet weni Schwizzerdütsch schriebe..... vermiss die Sproch scho bizli :)

Also fangemer doch vorne aa....

Also, de Flug isch super gsi, hanen Schwizzer gha wo mit mir gfloge isch. Schomol en super Start für mich. In Perth bini den vo zwei Staff Members herzlich empfange worde. Das isch so schön gsi, du bisch soo 20 Stund am reise und den wirsch eifach umarmt vo zwei "fremde" Lüüt, hami echt grad Willkomme gfühlt. Den isch zrugg gange id Base, zum Glück Obig gsih und ich ha grad chöne go pennne !! De ersti Morge.... pooor ich bi so ufgwacht und ghöör nur Englisch um mich ume rede. Im erste Moment hets mir grad abglöscht, neiii wo sind mini Schwiizer Fründe, help meeee!!! ??? Aber noch paar Stunde hani mir den en ruck gee und bin mit de anderne Studente go Beache ! Die erste 3 Täg sind eifach zum chli ilebe gsih, und am Sunntig isch den de offiziell Start gsi vode YWAM Sports DTS. Bin echt gpsanne gsih was do alles uf mich zue chunt....

I minre Klass simmer ingesamt 37 Studente us verschiedene Länder, sii hend gseit mir seged die grösst Sports DTS wos jee gha hend. Aber uf därä Base hets no anderi Klassene. Ingesamt simmer ca 270 Schüler. Ich lebe für die erste drei Mönet imne Masseschlag mit 40 Jungs zämä. Das isch e rechti useforderig was Ornig und Nachtrueh abelangt, doch jetz isches scho besser ! Mir schaffed alli dra 

De Tag lauft folgendermasse ab; Am Morge am 6i Isch tagwach, den hemmer Morgesport für 40 Minute, denoch isch Frühstück. Den hemmer Ämtli zmache, und den gots ab id Klass, det hemmer immer en Referent wo üs für 1 Wuchä es Thema nöcher bringt. Die erst Wuche isches Thema "Hearing God`s Voice" gsi und die Wuchä hemmer " Character and Nature of God" ! Und den isch scho Ziit fürs Mittagesse. Am Nomitag ischs Program unterschiedlich. Mengmol hemmer Freizit, mengmol hemer Sportunterricht. Es isch scho anstrengend die Predigte uf Englisch möse zlose, vorallem wenn si so schnell reded, aber es got immer bizli besser ! Am Obig isch den wieder Ämtliplan agseit und denoch Smallgroups, Worship oder Freiziit !  

*Wösch mache derf natürlich au nid fählä :)*

Wösch mache ghört au dezue !

Genau übers esse muesi no was schriebe. De Food isch guet, aber es isch viel zwenig für üs Sportler Nei das esse hebed für höchstens zwei Stund ane und den hesch scho wieder en mega hunger. Das isch chlige müehsam. Meistens gömmer am obig am 9ni nomol in McDonalds üsen Hunger go stille! 

Swetter do isch scho richtig summerlich, aber die erste Täg isch am Obig amed uu windig und chalt worde, und mir nur mit shirts und shorts am Sport mache. Den bini di erste paar Täg chli vercheltet gsi. Aber jetzt isch würklich uu schön warm. Gesterd hemmer 36 Grad gha, wärmsti Tag i dere Wuche. De Marvin (guete Kolleg) und ich sind gesterd zum Scarborough Beach gange, das isch de schönsti und grössti Strand do in Perth. Natürlich hemmer üs Surfboards gmietet und hends usprobiert, aber stoo hemmer nonid würklich chöne. Aber es war sooo funnny  

Und gester hemmer e mega Gebetserhörig derfe erleb. Mir sind ufem Weg gsi zum Beach mit Bus und Zug. Bim Bahnhof hemmer müese uf de Zug renne, dummerwiss isch mirs Handy us de Hose gheit, wasi erst im Zug den gmerkt han. Mir hend zwei möglichkeite gha; entweder kehred mir um und gönds Handy go sueche, oder mir bettet eifach defür und gönd jetz go surfe und suechets nocher. Mir hend üs für die zweit Variante entschiede. Mir hends eifach Gott anegleit, dass das Handy nochem surfe derf gfunde werde, und mir jetzt entspannt chönd go surfe ! Mir hend en super Mittag gha, mit viel Sunnä, Fun und Surfe. Ufem Heiweg simer den is Fundbüro gange, und siehe da, mis Handy isch gfunde und abgeh worde... Wooow sooo cools erlebniss gsi. Für üsen Gott isch nix unmöglich.... Uf somne rise Bahnhof i sonre grosse Stadt, mit so viel "kurlige" Lüüt, chunt das Handy eifach i di richtig Hand wos zum Fundbüro bringt !! Ha grad voll möse juchzäääää....! Gott isch eifach super ! wooow. Das isch sonen super Tag gsii !!

Ich bii mega gspanne was Gott für üs alli do no parat het, und freumi uf die kommende Themene!! Mir gots würklich guet do, es isch so cool mit so vielne Lüüt us verschieden Natione  mitenand vorwerts goo. Morn hemmer den üsen erste Strasseiisatz in Perth, do bini au mega gspanne, wie das wird mit mim super Englisch, doch Gott lot üs nie im Stich ! Yeah !

Also ich hoff ha eu chli chöne en chline Iblick gee, was do so abgoht, und was mir so erlebt. Freumi immer über Nochrichte vo eu, und ii probier mi auu zmelde, aber sind mir nid böss wenns mol länger got bis ich zrugg schriebe.... Bis zum nöchstemol 

Liebi Grüess usem warme Perth

Nate

29Sept
2014

Bald geht es los...

Herzlich Willkommen auf meinem Blog

Wie einige von euch sicherlich wissen, werde ich am Mittwoch 1. Oktober '14 für sechs Monate nach Australien gehen. In Perth besuche ich dort eine Jüngerschaftsschule (DTS) begleitend mit dem Thema Sport. Zuerst hat man drei Monate "Lecture Phase", wo man verschiedene Themen durchnimmt wie; Hearing God's Voice / The Nature & Character of God / Relationships / Missions /..... usw. In jeder Woche vertieft man sich in ein Thema. Und natürlich nicht zu vergessen mein Lieblingsthema: SPORT Der Tag beginnt mit Sport und endet mit Sport, wir werden dort verschiedene Sportarten verschiedener Kulturen ausüben und trainieren. Egal was für Sprachen man spricht, Sport verbindet jeder Mann/jede Frau ! Das ist einfach super 

Nach diesen drei Monaten Ausbildung werden wie in den " Outreach" gehen. Wo es uns hinführt ist noch unklar, denn dies soll eine Überraschung sein. Ihm Outreach geht es darum, das Evangelium den Menschen in Wort und Tat weiter zu geben. Fußball zum Beispiel ist sicherlich eine Sprache die jeder versteht, daraus gibt es perfekte Gelegenheiten für uns, die Leidenschaft für den Sport zu nutzen, um Beziehungen aufzubauen. Ich bin ja überhaupt kein Fan von Campen in der Wildniss und solchen Dingen, doch " do mueni eifach dure" !!

Jaja... doch nun steht mir noch der Abschied bevor, und wer mich kennt, weiss wie schlimm das für mich ist. Aber schön zu wissen ist; Ich werde wieder kommen! Jetzt heisst es alles noch einzupacken, vorallem die Sonnencreme und das Oel, denn dort wartet der lang ersehnte Sommer auf mich!! Werde euch sehr vermissen. Wenn es euch intressiert was ich alles erleben und unternehmen werde, besucht einfach wieder mein Blog. Mein Ziel ist es, wöchentlich einen Blogeintrag über das vergangene der Woche zu schreiben.

Ich freue mich auf diese spannende, abenteuerliche und sicherlich unvergessliche Zeit!

Lg Nate